Xunta de Galicia
Vostede está aquí:

Actualidade Comercial

  • 04 Febreiro, 2019
    A Xunta destina máis de 193.000 euros para a dixitalización e modernización de 50 comercios da provincia de Ourense
    A delegada territorial da Xunta en Ourense, Marisol Díaz Mouteira, destacou os máis de 193.000 euros que a Consellería de Economía, Emprego e Industria, en 2018 destinou ao comercio da provincia de Ourense co obxectivo da súa dixitalización e modernización. Fíxoo na visita que realizou a ‘Carmen Rey’ un dos comercios beneficiarios emprazado na rúa Parque de San Lázaro da cidade das Burgas. Na visita estivo acompañada do xefe territorial deste departamento autonómico, Santiago Álvarez González. Este comercio desenvolveu, ao abeiro deste programa de axudas e coa achega de 11.450 euros, un proxecto de modernización integral do seu local cuxo orzamento acadou os 22.900 euros Díaz Mouteira explicou que o obxectivo destas axudas é impulsar a transformación dixital do sector comercial e artesanal de cara a súa adaptación ás novas tendencias do mercado e para que sexan un motor de crecemento das vilas galegas. “Dado que o comercio é unha actividade en constante evolución, os comerciantes teñen que actualizarse de xeito continuo e adaptarse ás novas tecnoloxías e aos cambios nos hábitos de compra dos clientes”, indicou a delegada territorial. Na provincia ourensá son 50 os beneficiarios destas axudas, dos que 47 son comercios e 3 son obradoiros artesanais. A maioría deles, 26 pertencen á cidade, e o resto están emprazados en Allariz, Avión, Bande, O Barco de Valdeorras, O Carballiño, Celanova, Entrimo, A Rúa, Verín, Viana do Bolo e Xinzo de Limia. Grazas a este programa, 40 desenvolverán actuacións de implantación ou actualización de páxinas web comerciais e de mellora da imaxe en liña. Ademais, poñeranse en marcha 9 iniciativas centradas na loxística dixital ou a implantación de packaging para venda en liña. Doutra banda, activaranse 15 proxectos de ferramentas de xestión, e modernizaranse 8 locais. Ademais, a través desta mesma orde de axudas, 9 dos comercios beneficiarios contaron co asesoramento dun xestor de redes sociais para desenvolver novas fórmulas de promoción e comercialización en internet, no marco do programa de Social Commerce que se desenvolve en colaboración coa Federación Galega de Comercio. O obxectivo desta iniciativa é potenciar a presenza do comercio galego de proximidade nas redes sociais, impulsando a súa conexión co cliente e creando novas redes de fidelización e imaxe de marca. O investimento subvencionable, segundo o tipo de apoio solicitado, pode ir dos 1000 aos 5000 euros no caso de dixitalización e entre os 15.000 e os 30.000 no caso de actuacións de modernización. A porcentaxe de axuda é en todos os casos do 50%. Estas axudas enmárcanse no Plan Estratéxico de Impulso ao Comercio de Galicia, que ten entre os seus retos o establecemento dun novo modelo de comercio intelixente que sitúe ao cliente no centro da súa estratexia aproveitando todos os recursos á súa disposición. Na actualidade a Xunta está a traballar na próxima convocatoria destas axudas e prevese a publicación da Orde de axudas correspondente a 2019 ao longo deste primeiro trimestre do ano. Máis información
  • 01 Febreiro, 2019
    A Xunta destaca en Pontevedra o papel do asociacionismo comercial na dinamización do comercio de proximidade
    A directora xeral de Comercio e Consumo, Sol Vázquez Abeal, salientou hoxe en Pontevedra o papel do asociacionismo comercial na dinamización do comercio de proximidade, impulsando a posta en marcha de iniciativas conxuntas para atraer clientela e achegarlle novos servizos. Vázquez Abeal participou na inauguración de Stock Pontevedra, un evento organizado polo centro comercial urbano Zona Monumental que durante toda a fin de semana reunirá no recinto feiral de Pontevedra un total de 58 expositores con ofertas de moda, fogar e decoración. O apoio ao asociacionismo comercial é un dos eixos, que o ano pasado concedeu máis dun millón de euros en axudas a federacións de comerciantes, centros comerciais abertos e asociacións de praceiros da provincia de Pontevedra, entre os que se atopa Zona Monumental. Máis información
  • 28 Xaneiro, 2019
    A Xunta informa aos empresarios do polígono do Tambre das axudas dispoñibles para impulsar a actividade económica e industrial
    Santiago de Compostela, 28 de xaneiro de 2019.- O conselleiro de Economía, Emprego e Industria, Francisco Conde, estivo hoxe no polígono do Tambre -formado por 400 empresas e 6.500 traballadores directos e indirectos- nun networking co tecido empresarial para informar sobre as medidas que a Xunta ten en marcha e as que activará ao longo deste ano co obxectivo de impulsar a actividade económica e industrial da comarca. A xuntanza forma parte da rolda de contactos que está a levar a cabo o conselleiro co tecido empresarial galego para coñecer de primeira man as súas necesidades e intercambiar propostas para seguir impulsando a competitividade industrial. O obxectivo destes encontros é que ningún autónomo, empresa ou emprendedor teña que renunciar aos seus plans por falta de información ou de apoio. Conde destacou que a Consellería activará durante o primeiro trimestre deste ano esta axudas que suman máis de 100M€ vinculadas a diversos campos como as novas tecnoloxías, a internacionalización empresarial, a promoción da eficiencia enerxética, a modernización do comercio local, a mellora das infraestruturas nos parques empresariais e o acceso ao solo industrial, o impulso do emprego e o fomento do emprendemento e a atención aos autónomos. O conselleiro fixo fincapé nos programas relacionados co emprego, como as Unidades Formativas nas Empresas, que acaba de ampliar o prazo de solicitude ata o 11 de febreiro, e que busca formar a 2000 persoas cun investimento de 3,5M€; tamén se acaba da abrir unha nova liña de apoios para a promoción do emprego autónomo que inclúe a contratación indefinida de persoas asalariadas e a consolidación de pemes de nova creación e de base tecnolóxico cun orzamento total de 14M€; tamén se referiu a outros programas cos prazos de solicitude xa abertos como o Galicia Inviste, que con nove millóns de euros busca apoiar 140 novas pemes; as axudas para a mellora das infraestruturas dos parques empresariais e a creación de viveiros industriais e as do Igape para impulsar a dixitalización das pemes galegas, estas últimas cunha mobilización prevista de máis de 13 millóns. Neste último senso, o polígono do Tambre conta con infraestruturas avanzadas de banda ancha de máis de 100Mbps, imprescindible para poder traballar coas tecnoloxías máis avanzadas. Conde explicou que a Xunta apoiará, neste parque, o polo da biotecnoloxía e da madeira, dous sectores estratéxicos que contan na cidade cunha gran capacidade instalada. Así mesmo, salientou que xa están aprobados os apoios para impulsar a eficiencia enerxética en fogares, nas empresas do sector industrial, servizos e no agrícola que mobilizarán máis de 24 millóns. Tamén lembrou que hoxe se publica no Diario Oficial de Galicia o programa Reforma TUR 2019 con 3M€ este ano para axudar a 500 establecementos hoteleiros a realizar investimentos que melloren os seus servizos de cara ao Xacobeo 2021 e que mobilizará 24M€ entre pemes e autónomos da construción. Para rematar, o titular de Economía puxo en valor a Lei de implantación empresarial, lembrando que facilita ao máximo a actividade das empresas a través da simplificación administrativa e con bonificacións fiscais que se amplían no caso de que as compañías estean asentadas en Concellos Emprendedores. Na provincia da Coruña existen na actualidade un total de 28 concellos, entre os que non figura Santiago de Compostela pero si varios da comarca: Ames, Boqueixón, Val do Dubra e Vedra. Máis información
  • 23 Xaneiro, 2019
    A Xunta achega aos empresarios de San Cibrao das Viñas os apoios que pon á súa disposición para impulsar os negocios locais
    O conselleiro de Economía, Emprego e Industria, Francisco Conde, mantivo hoxe no polígono de San Cibrao das Viñas -formado por 320 empresas e 8000 traballadores directos e indirectos- unha xuntanza co tecido empresarial para darlle a coñecer as medidas que o Goberno galego ten en marcha e as que activará ao longo deste ano co obxectivo de impulsar os negocios locais e dinamizar a actividade económica da comarca. A xuntanza forma parte da rolda de contactos que está a levar a cabo o conselleiro co tecido empresarial galego para coñecer de primeira man as súas necesidades e intercambiar propostas para seguir impulsando a competitividade industrial. O obxectivo destes encontros é que ningún autónomo, empresa ou emprendedor teña que renunciar aos seus plans por falta de información ou de apoio. Conde destacou que a Consellería activará ao longo deste ano medidas vinculadas a diversos campos como as novas tecnoloxías, a internacionalización empresarial, a promoción da eficiencia enerxética, a modernización do comercio local, a mellora das infraestruturas nos parques empresariais e o acceso ao solo industrial, o impulso do emprego e o fomento do emprendemento e a atención aos autónomos. Neste sentido, destacou que durante o primeiro trimestre deste ano esta previsto activar axudas que suman máis de 100M€. O conselleiro tamén se referiu a programas cos prazos de solicitudes xa abertos como o Galicia Inviste, que con nove millóns de euros busca apoiar 140 novas pemes; as axudas para a mellora das infraestruturas dos parques empresariais e a creación de viveiros industriais e as do Igape para impulsar a dixitalización das pemes galegas, estas últimas cunha mobilización prevista de máis de 13 millóns. Neste último senso, San Cibrao das Viñas conta con infraestruturas avanzadas de banda ancha de máis de 100Mbps, imprescindible para poder traballar coas tecnoloxías máis avanzadas. Así mesmo, salientou que xa están aprobados os apoios para impulsar a eficiencia enerxética en fogares, nas empresas do sector industrial, servizos e no agrícola que mobilizarán máis de 24 millóns. No eido do emprendemento destacou a rede de aceleradoras galegas que, agrupada na plataforma StartIN Galicia, xa leva impulsado 900 proxectos e da que forma parte o coworking de San Cibrao das Viñas para o que aínda está aberta a nova convocatoria. Para rematar, o titular de Economía puxo en valor a Lei de implantación empresarial, lembrando que facilita ao máximo a actividade das empresas a través da simplificación administrativa e con bonificacións fiscais que se amplían no caso de que as compañías estean asentadas en Concellos Emprendedores. Na provincia de Ourense existen na actualidade un total de 55 concellos, entre os que figura San Cibrao das Viñas. Máis información
  • 16 Xaneiro, 2019
    A Xunta apoia o traballo do centro comercial aberto das Travesas de Vigo para dinamizar o comercio de proximidade
    A directora xeral de Comercio e Consumo, Sol Vázquez, participou hoxe na entrega do premio da campaña de Nadal do Centro Comercial Aberto (CCA) As Travesas de Vigo. A persoa galardoada recibiu 300 euros en cheques regalos para consumir nos comercios asociados a este CCA. A entrega do galardón tivo lugar no establecemento Dicus Vigo, onde o premiado realizou a súa compra. A Consellería de Economía, Emprego e Industria apoiou en 2018 aos centros comerciais abertos de Vigo e prazas de abastos cun máis de 177.000 euros. O CCA das Travesas, en concreto, recibiu unha axuda de 40.000 euros. Máis información
  • 16 Xaneiro, 2019
    Conde inicia en Vilagarcía unha rolda de xuntanzas co tecido local empresarial para informar sobre o mapa de apoios da Xunta ás pemes
    O conselleiro de Economía, Emprego e Industria, Francisco Conde, iniciou hoxe en Vilagarcía unha rolda de xornadas co tecido local empresarial para escoitar as súas propostas e dar a coñecer o mapa de apoios da Administración Autonómica para impulsar a súa actividade ao longo deste ano 2019. Estas axudas teñen como principal obxectivo dar resposta ás necesidades dos emprendedores. Na xuntanza celebrada hoxe, que contou para o seu desenvolvemento coa colaboración da Cámara de Comercio de Pontevedra, Vigo e Vilagarcía e da Federación Comarcal de Empresarios de Arousa (FECA), o titular de Economía sinalou que as axudas autonómicas para 2019 se centran en apoiar a incorporación de novas tecnoloxías ás pemes galegas, impulsar a súa internacionalización e promoción da eficiencia enerxética, así como fomentar o emprendemento, a modernización do comercio local, a mellora das infraestruturas nos parques empresariais e o acceso ao solo industrial. Así mesmo, indicou que a Consellería de Economía, Emprego e Industria busca con estes apoios impulsar de xeito especial o emprego local, lembrando que o paro baixou en Vilagarcía no 2018 un 10,17% con respecto a 2017 e na comarca do Salnés un 10%. Así, neste mesmo mes de xaneiro, a Xunta xa publicou no Diario Oficial de Galicia (DOG) axudas por valor de 40 millóns de euros entre as que se atopan os apoios do Igape para impulsar a dixitalización das pemes galegas cun orzamento de 5 millóns e unha mobilización prevista de máis de 13 millóns. Esta iniciativa, tal e como explicou o conselleiro, forma parte dun paquete máis amplo que se irá convocando en vindeiras semanas para que a tecnoloxía dixital siga avanzando na industria e empresas galegas. Con este paquete de apoios estímase unha mobilización de 70 millóns de euros. Así mesmo, xa se abriu o prazo de solicitude das axudas para mellorar as infraestruturas dos parques empresariais e para a creación de viveiros industriais, que contan cun orzamento de 5,5 millóns de euros. Con respecto ao primeiro dos programas, o prazo de inscrición remata o próximo 11 de febreiro. O prazo de solicitude das axudas para financiar a creación de viveiros industriais abriuse hoxe mesmo e rematará o 15 de febreiro. Conde, ademais, salientou os apoios xa aprobados para impulsar a eficiencia enerxética nas empresas dos sectores industrial, servizos e no agrícola que mobilizarán máis de 24 millóns. No eido da dixitalización, o conselleiro lembrou que os parques empresariais do Pousadoiro, Bamio e Trabanca contan cunha rede ultrarrápida de máis de 100Mbps, un xeito imprescindible para que as empresas poidan traballar con tecnoloxías máis avanzadas. Para rematar, o titular de Economía puxo en valor que Vilagarcía conta cun tecido empresarial consolidado que factura en conxunto máis de 65 millóns de euros. Lembrou, ademais, que a localidade arousá é un Concello Emprendedor, polo que comparte o espírito da Lei de implantación empresarial da Xunta de poñer facilidades administrativas e fiscais á actividade industrial Máis información
  • 08 Xaneiro, 2019
    Hoxe publícase no DOG a Orde pola que se establecen as bases reguladoras para a concesión das bolsas de formación na Dirección Xeral de Comercio e Consumo
    ORDE do 12 de decembro de 2018 pola que se establecen as bases reguladoras para a concesión das bolsas de formación na Dirección Xeral de Comercio e Consumo e se procede á súa convocatoria para o ano 2019 (código de procedemento IN225A). Máis información
  • 26 Decembro, 2018
    A Xunta apoia a celebración da 34 edición de Ofeitoaman en Vigo como a feira de artesanía de referencia no Nadal en Galicia
    A directora xeral de Comercio e Consumo, Sol Vázquez, acompañada do delegado territorial da Xunta en Vigo, Ignacio López-Chaves, achegouse esta mañá ata Vigo para visitar a 34 edición de Ofeitoaman, a feira de artesanía máis emblemática do Nadal en Galicia. No evento, que se celebra ata o 5 de xaneiro, participan un total de 25 obradoiros pertencentes á marca Artesanía de Galicia, especializados en oficios como a xoiaría, o coiro, a cerámica, o téxtil, a elaboración de calzado e de zocos, a talla en madeira ou a aplicación do oficio tradicional das colareiras aos complementos. A mostra complétase coa participación dun obradoiro especializado no téxtil procedente do Norte de Portugal. Ofeitoaman está organizada pola Asociación Galega de Artesáns (AGA) que contou co apoio da Administración autonómica para o seu desenvolvemento a través das axudas para o fomento da comercialización da artesanía galega e impulso da competitividade do sector artesán. A Xunta concedeu á asociación 30.000 euros para a organización deste evento e da feira Mostrart, que se celebrou o pasado verán na cidade da Coruña. Os expositores galegos de Ofeitoaman son obradoiros rexistrados no Rexistro Xeral da Artesanía de Galicia, e presentan obras acollidas baixo a marca oficial Artesanía de Galicia, que garante a súa cualificación e orixe. Este ano, ademais dos expositores habituais, participan por primeira vez cinco novos obradoiros: Anudo (A Coruña), que realiza complementos de moda; Chorima (O Porriño), especializado en marroquinería; Como Cuando (Vigo) coa súa obra en cerámica; Le Chanelas (Vigo), que deseña roupa artesanal; e Verdecima (Mos), especializado en madeira tallada. Así mesmo, cóntase coa participación doutros artesáns que repiten experiencia doutros anos, como Zimzelatum (Gondomar), Varo Caride (Vigo), Taller Sur (Marín), Sánchez-Cano Orfebres (Vigo), Rosa Higuero (Cabanas), Rosa Fraiz (Vilagarcía de Arousa), PazNavas (A Coruña), Montse Betanzos (O Grove), Mico Deseño Textil (Vigo), Mario López (Vigo), Laia Zapateiros (Melide), Joyas de Papel (Nigrán), Flecharte e Bruxarte (Vigo), Elena Ferro (Vila de Cruces), Coas Mans Artesanía (Silleda), Cabuxa (Tui), Ardentía (A Coruña), Cerámica Ferreira (Vigo) e Artesave, de Vila do Conde (Portugal). A feira supón unha proposta de mercado de nadal monográfico, no que os obradoiros participantes presentan as súas creacións orixinais directamente ao público, como unha alternativa cargada de autenticidade, fronte a outros agasallos máis convencionais. Toda a información sobre os expositores con enlaces as súas webs pode consultarse na web da feira. A feira permanecerá aberta na zona exterior do Centro Comercial A Laxe, fronte á Estación Marítima, ata o día 5 de xaneiro, e pechará os días 25 de decembro e 1 de xaneiro. O horario de visita é de 11,00 horas a 14,00 horas e de 16,30 horas a 21,00 horas (os días 24 e 31 pechará ás 18,30 horas) Máis información
  • 20 Decembro, 2018
    Hoxe se publicou no Diario Oficial de Galicia a resolución de concesión dos premios do comercio galego convocados pola Orde do 31 de xullo de 2018 (Diario Oficial de Galicia do 13 de agosto)
    RESOLUCIÓN do 10 de decembro de 2018, da Dirección Xeral de Comercio e Consumo, pola que se publica a concesión dos premios do comercio galego convocados pola Orde do 31 de xullo de 2018 (Diario Oficial de Galicia do 13 de agosto). Máis información
  • 13 Decembro, 2018
    A Xunta impulsa a compra de Artesanía de Galicia este Nadal como un agasallo único e de calidade
    A directora xeral de Comercio e Consumo, Sol Vázquez, acompañada pola xerente da Fundación Artesanía de Galicia, Elena Fabeiro, convidou hoxe á cidadanía a comprar Artesanía de Galicia este Nadal como un “agasallo único e de calidade”. Nunha visita ao obradoiro compostelán Noroeste, Vázquez Abeal presentou a imaxe coa que se achega de cara ás próximas festas unha visión contemporánea, actual e diferenciada do sector. A iniciativa é un adianto da próxima campaña de imaxe da marca Artesanía de Galicia, coa que se busca achegar unha visión fresca e contemporánea do sector artesán galego, un escaparate da heteroxeneidade do sector e da súa alta calidade, ao tempo que se busca animar a sociedade a valorar a artesanía tradicional galega e a incorporala á súa vida diaria tanto nos espazos de decoración como no relacionado coa moda persoal. A campaña estará composta de diferentes escenas onde as protagonistas serán as pezas feitas e deseñadas en Galicia polos profesionais do sector artesán, como é o caso desta primeira imaxe, inspirada na época do Nadal e orientada a animar a sociedade a que Artesanía de Galicia estea presente tanto nos agasallos coma na decoración dos fogares e dos eventos festivos típicos deste momento do ano. Nesta primeira imaxe aparecen representados oficios como a carpintería de ribeira, a elaboración de redes, a marroquinería, a olería e a cerámica, a forxa, a cestería contemporánea, o téxtil ou a tornaría de madeira. O resultado é unha imaxe actual e contemporánea dunha escena inspirada na época do Nadal, á que lle seguirán outras imaxes que se irán publicando ao longo do ano e nas que se ofrecerán propostas de usos de diferentes pezas en diversos ambientes e situacións. Nova normativa da marca No acto, celebrado no espazo de Noroeste Obradoiro – gañador do Premio Artesanía de Galicia 2016 – a directora xeral de Comercio e Consumo falou tamén da nova normativa da marca Artesanía de Galicia, coa que se ofrece unha imaxe máis actual e máis acorde coas necesidades dos obradoiros artesanais galegos, ao tempo que se avanza na simplificación administrativa para autorizar o uso deste distintivo. Coa actualización da normativa, publicado o mes pasado no Diario Oficial de Galicia, a Xunta avanza na simplificación administrativa e afianza a presenza da marca na comercialización de produtos artesáns, ao tempo que permite reforzar esta distintivo e o seu recoñecemento como un sinónimo de calidade e prestixio. Así, actualízase o manual de uso da marca, con novos deseños de packaging e cun novo deseño de etiquetas intelixentes que levarán incorporado un sistema de código QR con información dixital sobre a persoa artesá e o produto, o proceso de elaboración, e os materiais. Tamén se introducen elementos de identificación e sinaléctica para feiras e outros eventos artesanais, así como a regulación dos elementos de sinalización dixital. Máis información
  • 12 Decembro, 2018
    A praza de abastos de Tomiño convértese na primeira en contar co selo de mercado excelente que outorga a Xunta
    O conselleiro de Economía, Emprego e Industria, Francisco Conde, entregou hoxe á praza de abastos de Tomiño o distintivo de Mercado Excelente, converténdose así no primeiro en contar con este selo que outorga a Xunta. Conde sinalou que se trata dun recoñecemento ao traballo colectivo, salientando o esforzo das distintas partes implicadas. Así, apuntou que o Concello que apostou por estas instalacións, contando cun apoio da Xunta de máis de 400.000 euros, e resaltou de xeito especial a implicación dos praceiros e praceiras, que coa súa profesionalidade converten o mercado tomiñés nun emblema de calidade e excelencia. Do mesmo xeito, subliñou o respaldo da cidadanía, que comprando no mercado día a día potencia un punto de encontro no que o comercio, a gastronomía e as actividades de ocio van da man, e un centro de negocios no que pemes e autónomos desenvolven a súa actividade de forma competitiva, creando riqueza e emprego. A praza de Tomiño acada o selo de Mercado Excelente pola súa resposta aos retos de modernización e innovación sen perder a súa autenticidade e tradición, así como pola proximidade e o trato personalizado. Á hora de conceder este recoñecemento, a Xunta valorou catro grandes áreas: a imaxe do mercado, instalacións e accesibilidade; a organización, unidade de xestión e profesionalidade dos praceiros e praceiras; a atención ao cliente e a prestación de servizos; e a implicación e integración do mercado na vida social do concello. Francisco Conde sinalou que, para que máis prazas de abastos avancen neste camiño, o próximo ano a Consellería de Economía, Emprego e Industria porá en marcha unha nova orde de axudas na que os Mercados Excelentes terán preferencia. Ademais, sinalou que no vindeiro 2019 as prioridades da Xunta en materia de comercio seguirán sendo a dixitalización e a innovación do sector. A este ámbito destinarase preto dun 12% máis no orzamento, o que permitirá a posta en marcha de novas iniciativas como os laboratorios dixitais, que asesorarán e guiarán aos comerciantes. Este incremento no orzamento tamén posibilitará incidir en aspectos como a ecoinnovación, buscando a sustentabilidade ambiental do sector. Neste ámbito, sinalou que se vai buscar a colaboración das asociacións de comerciantes das prazas de abastos para a utilización de ecoenvases, o que permitirá incidir aínda máis na vinculación co territorio que teñen estas instalacións. Máis información
  • 05 Decembro, 2018
    Conde subliña que os premios do Comercio Galego deixan patente que o sector sabe reiventarse para afrontar novos retos
    O conselleiro de Economía, Emprego e Industria, Francisco Conde, subliñou hoxe na entrega dos Premios do Comercio Galego 2018 que os galardoados neste certame deixan patente que o comercio de proximidade sabe reinventarse para afrontar novos retos. Na súa intervención, Conde, que destacou o enorme esforzo que está a realizar o comercio galego por adaptarse ás cada vez máis esixentes demandas dos consumidores. Neste sentido, as prioridades da Xunta neste eido para o próximo ano seguirán sendo a dixitalización e a innovación do sector, un ámbito ao que se destinará preto dun 12% máis no orzamento. Esta decisión permitirá a posta en marcha de novas iniciativas como os laboratorios dixitais, que asesorarán e guiarán aos comerciantes nesta materia; e tamén posibilitará incidir en aspectos como a ecoinnovación, buscando a sustentabilidade ambiental e a aposta por un sector comercial vinculado ao coidado do entorno. O conselleiro de Economía, Emprego e Industria, que sinalou que nos últimos seis anos a Xunta colaborou coa posta en marcha de máis de 4600 actuacións de dixitalización no pequeno comercio galego, fixo fincapé en que, no actual mercado global, cómpre converter os desafíos en oportunidades, e que o comercio de proximidade ten no trato coidado e na calidade a súa mellor carta de presentación. Distincións autonómicas e provinciais Os Premios do Comercio Galego 2018 distinguen os establecementos a nivel provincial e autonómico que na súa xestión comercial executan accións innovadoras que comporten unha clara diferenciación e unha mellora na fidelización e a personalización do servizo e do produto. Para iso, valórase a transformación dixital, os servizos engadidos á propia oferta comercial, accións promocionais especiais e utilización de ferramentas tales como a web e as redes sociais como canles de comunicación e venda e a integración entre as canles on line e off line. O Premio Comercio de Galicia está dotado cunha contía de 3.000 euros; o Premio Comercio Provincial, cunha contía de 2.000 euros por provincia; e o Premio Iniciativa Dixital para asociacións de comerciantes, cunha contía de 1.500 euros. Nesta ocasión, o Premio Comercio de Galicia 2018 recaeu en Del mar al plato, unha peixería viguesa que vende on line e de xeito presencial, e que envía a empresas e domicilios o produto das lonxas galegas, sen intermediarios, en menos de 24 horas. Na Coruña, resultou gañador o establecemento compostelán Le Petit Coin, con moda e decoración centrada nos máis pequenos. Entre outros aspectos, o xurado destacou que empregan o chat como nova canle de márketing, así como o deseño da súa páxina web e a presenza en redes sociais. En Lugo, resultou premiado o bazar Tobarix, un comercio con gran tradición do que se destaca, ademais do seu uso da rede, a participación en diferentes iniciativas de dinamización comercial e a súa implicación na vida da cidade. No que respecta a Ourense, o recoñecemento correspondeulle a The Cosmethics, unha tenda de cosméticos naturais e orgánicos de alta gama con sede en Allariz e que desenvolve boa parte da súa actividade a través do comercio electrónico, con envíos totalmente personalizados e orientando en base ao tipo de pel de cada persoa. No tocante á provincia de Pontevedra, prémiase o negocio vigués Sémola, dedicado á elaboración de pan e doces. Á hora de conceder o galardón, destácase o deseño das tendas, a presenza on line e a posta en marcha de campañas promocionais. Do mesmo xeito, tamén se destaca a elaboración de produtos pensados especialmente para nenos, con packaging propio deseñado por unha ilustradora. Ademais, dentro dos Premios do Comercio Galego tamén se inclúe o premio Iniciativa Dixital, para asociacións de comerciantes. Nesta categoría elíxese entre aquelas asociacións que poñan en práctica proxectos tecnolóxicos vinculados ao comercio que inclúan presenza na rede, utilización de novas tecnoloxías e que incrementen a fidelización e os servizos prestados aos clientes. Resultou gañadora a Asociación de Empresarios do Deza, pola súa iniciativa de fidelización APP bigpoint, unha aplicación que permite aos usuarios acceder ás ofertas do comercio local e recuperar parte do importe das súas compras para realizar outras. Máis información
  • 03 Decembro, 2018
    A Xunta destaca o labor de impulso do Colexio e a Federación de Xoieiros a este oficio artesán
    A directora xeral de Comercio, Sol María Vázquez Abeal, e a xerente da Fundación Centro Galego da Artesanía e do Deseño, Elena Fabeiro Castro, participaron hoxe na Gala de San Eloi organizada polo Colexio Oficial de Xoiaría de Galicia e pola Federación Galega de Xoieiros, no pazo Adrán de Teo (A Coruña), para conmemorar o patrón deste oficio artesanal. Na gala fíxose un recoñecemento público a xoieiros, entre os que se atopa o ourive compostelán Ricardo Rivas, así como a presentación da campaña de publicidade de Nadal. A Gala San Eloi constitúe unha oportunidade para o recoñecemento público por parte do sector da xoiaría galega a profesionais e personalidades galegas a través da entrega das Seguetas de Prata e Ouro do Colexio Oficial de Xoiaría, así como da insignia de prata da Federación Galega de Xoieiros. Este ano as Seguetas de Prata por toda unha vida entregada á xoiería concedéronse a Senén Rodríguez Martínez (Joyería Senén, Lugo), a Hermesindo José Mosquera Fernández (Joyería Hema, Cangas) e a Pedro Villar Alonso (Relojería Villar, A Pobra de Trives). A segueta de ouro foi para César Blanco Fidalgo, pola súa especial traxectoria como empresario do sector xoieiro. Pola súa parte, a Federación de Xoieiros entregoulle a insignia de prata ao ourive compostelán Ricardo Rivas, ao engastador coruñés Antonio Rama Duro e ao empresario lucense José Antonio Refojo Díaz. Desde a Consellería de Economía, Emprego e Industria destácase o importante labor do Colexio Oficial de Xoiería de Galicia en favor do sector e a súa implicación ao longo dos últimos anos en diferentes proxectos emprendidos polo goberno galego en materia de artesanía, co obxectivo de impulsar a introdución do produto artesán galego no mercado internacional baixo a imaxe común do feito en Galicia e a garantía de calidade e prestixio que lles brinda a marca Artesanía de Galicia. Máis información
  • 22 Novembro, 2018
    A Xunta destaca o papel do asociacionismo no impulso ao comercio do Barco de Valdeorras
    A directora xeral de Comercio e Consumo, Sol Vázquez Abeal, participou hoxe na asemblea xeral ordinaria do centro comercial aberto (CCA) do Barco de Valdeorras. Na súa intervención, Vázquez Abeal destacou o papel desta entidade no impulso ao comercio local. A Consellería de Economía, Emprego e Industria colabora co CCA na posta en marcha de diferentes actuacións centradas na dinamización e na atracción de clientes, a través do programa para impulsar o traballo dos centros comerciais abertos, no que a asociación do Barco obtivo unha axuda de máis de 35.000 euros. A Xunta ten en marcha o Plan estratéxico de impulso ao Comercio de Galicia, que busca modernizar e incrementar a competitividade do comercio de proximidade galego e que está articulado arredor de tres grandes retos: afianzar un sector comercial renovado; impulsar o smart commerce e o comercio electrónico; e potenciar o comercio excelente, traballando na dinamización e a mellora continua. Un dos eixos clave deste plan é o apoio ao asociacionismo comercial, polo importante labor que desenvolve na modernización e a dinamización do sector. Máis información
  • 21 Novembro, 2018
    A Xunta impulsa a modernización do comercio de proximidade con achegas de máis de 330.000 euros na provincia
    A Consellería de Economía, Emprego e Industria achegou máis de 330.000 euros en axudas entre 72 comerciantes da provincia para a modernización e dixitalización das súas empresas e para medidas de expansión comercial. Este montante supón o 50 por cento do investimento subvencionable. O delegado territorial da Xunta en Lugo, José Manuel Balseiro, deu a coñecer hoxe estes datos durante a visita a varios establecementos de Sarria, municipio no que hai 15 comercios beneficiarios que reciben unha contía global de preto de 32.000 euros. Balseiro sinalou que os comerciantes lucenses demostraron nesta convocatoria un notable interese por incorporar a venda en liña, mellorando a súa presencia na internet. “Os empresarios están a realizar un importante esforzo de modernización e adaptación para poder competir no novo modelo de mercado -afirmou-, e a Xunta respalda ese esforzo para garantir o futuro do comercio de proximidade, que é a alma das nosas vilas e cidades”. O delegado detallou que as axudas atenderon a un ou varios conceptos segundo o solicitado polos comerciantes, que nun bo número de casos sumaron apoios para distintas actuacións. En xeral, o 75 por cento das solicitudes están orientadas a mellorar a presencia na internet e as ferramentas de xestión. Así, entre as medidas máis demandadas figuran 25 proxectos de implantación ou actualización de páxinas web e a mellora da imaxe en liña dirixidas á comercialización dos seus produtos, e 26 proxectos para a implantación de ferramentas como sistemas integrados para a planificación de recursos empresariais, comerciais e software adecuados ás necesidades da empresa. Tamén se impulsan catro proxectos de deseño e implantación de packaging para a venda en liña, e dous para novas fórmulas de comercialización. Ademáis, 25 solicitantes engadiron os servizos de xestión de redes sociais; neste caso, a axuda da Xunta consiste nun tícket para a xestión de redes sociais, no marco do programa de Social Commerce que se desenvolve en colaboración coa Federación Galega de Comercio. Por último, 15 solicitantes reciben achegas para a modernización integral do local comercial incluídos nun proxecto de decoración e interiorismo. Sufraganse obras como a reforma e acondicionamento integral da superficie de exposición e venda do local comercial, adquisición de moblaxe e equipamento, e mellora da fachada exterior. Máis información
  • 20 Novembro, 2018
    A Xunta suma ás prazas de abastos galegas á campaña do Día Internacional contra a Violencia de Xénero
    A secretaria xeral da Igualdade, Susana López Abella, e a directora xeral de Comercio e Consumo, Sol Vázquez, presentaron hoxe en Sanxenxo a campaña da Xunta con motivo da conmemoración, o próximo 25 de novembro, do Día internacional contra a Eliminación da Violencia de Xénero, á que a partir de agora se adhire a Federación de Prazas de Abastos de Galicia (Fepragal). A administración autonómica puxo en valor esta nova adhesión, en tanto a Federación aglutina un total de 13 prazas que constitúen un espazo fundamental de encontro a nivel local e que, polo tanto, suporán unha importante contribución á divulgación da campaña. A través desta colaboración, as prazas disporán de material relacionado coa campaña institucional do 25 de novembro, que ten como mensaxe principal: “Fronte á violencia de xénero só cabe unha resposta. Sen ningún xénero de dúbida. NON” Con este lema, a Xunta quere dicirlle NON a todas a formas de violencia de xénero que están recollidas na Lei 11/2007, do 27 de xullo, galega para a prevención e o tratamento integral da violencia de xénero e que se recollen no seu artigo 3: Violencia física, Violencia psicolóxica, Violencia económica, Violencia sexual e abusos sexuais, Acoso sexual, e a trata de mulleres e nenas con fins de explotación sexual. Ademais, a Xunta tamén facilitou á Federación outro material relacionado coa concienciación nesta materia, como trípticos con información coas preguntas máis frecuentes ou consellos relacionados coa seguridade, así como carteis para dar a coñecer a aplicación “AgresionsOFF”. Máis información
  • 15 Novembro, 2018
    A Xunta impulsa a modernización e o asociacionismo do comercio de proximidade con achegas de case 240.000 euros na Mariña
    A Consellería de Economía, Emprego e Industria concedeu apoios na comarca da Mariña por importe de preto de 240.000 euros para impulsar a modernización e o asociacionismo do comercio de proximidade. O delegado territorial, José Manuel Balseiro, expuxo este dato na presentación dunha campaña para dar visibilidade ao pequeno comercio local organizada pola Federación de Comercio da Mariña. Balseiro gabou o labor da Federación comarcal, “propulsora de iniciativas que amparan a todos os asociados como si, efectivamente, formaran un único proxecto, un gran centro comercial aberto”, afirmou. Na mesma liña, lembrou que a entidade conta co apoio da Xunta “porque compartimos obxectivos” e que recibe financiamento para iniciativas como a que hoxe se presenta, en concreto este ano 33.600 euros. Co mesmo obxectivo, engadiu, a Xunta distribuíu 130.000 euros en apoios para a Asociación de Comerciantes de Ribadeo, a Asociación de Vendedores da Praza de Abastos da mesma localidade, o Centro Comercial Casco Histórico de Viveiro e a Asociación de Comerciantes de Foz. Igualmente, recibiron axudas por importe de 75.000 euros once comercios da Mariña para a realización de obras de modernización ou proxectos de dixitalización e comercialización en liña. O delegado subliñou que o comercio de proximidade “é a alma das nosas vilas e cidades; en torno aos comercios articúlanse espazos de ocio e de reunión que son un polo de atracción para veciños e visitantes”. Neste sentido, destacou o importante de esforzo de modernización e adaptación que están a facer os comerciantes para poder competir no novo modelo de mercado. Balseiro detallou que as axudas da Xunta para os once proxectos de mellora promovidos polos comerciantes mariñáns supoñen o 50 por cento do investimento subvencionable que declararon. “Os empresarios demostran un notable interese por incorporar a comercialización online, mellorando a súa presencia na internet e as ferramentas de xestión”, manifestou. Apoios por varios conceptos As axudas poden atender a máis dun concepto. Así, a práctica totalidade dos beneficiarios demandan a implantación ou actualización de páxinas web e a mellora da imaxe en liña dirixidas á comercialización dos seus produtos, e catro solicitantes engaden proxectos para a implantación de ferramentas como sistemas integrados para a planificación de recursos empresariais, comerciais e software adecuados ás necesidades da empresa. As achegas da Xunta tamén impulsan un proxecto de deseño e implantación de packaging para a venda en liña, outro para novas fórmulas de comercialización, e un terceiro beneficiario solicita os servizos de xestión de redes sociais; neste caso, a axuda da Xunta consiste nun tícket para a xestión de redes sociais, no marco do programa de Social Commerce que se desenvolve en colaboración coa Federación Galega de Comercio. Por último, dous solicitantes reciben achegas para a modernización integral do local comercial incluídos nun proxecto de decoración e interiorismo. Sufráganse obras como a reforma e acondicionamento integral da superficie de exposición e venda do local comercial, adquisición de moblaxe e equipamento, e mellora da fachada exterior. Máis información
  • 09 Novembro, 2018
    A directora xeral de Comercio e Consumo, Sol Vázquez Abeal, participou na inauguración da Feira Internacional de Produtos e Servizos Funerarios (Funergal), en cuxa décima edición participan 111 exposi
    A directora xeral de Comercio e Consumo, Sol Vázquez Abeal, destacou hoxe na inauguración da Feira Internacional de Produtos e Servizos Funerarios (Funergal) o importante papel que desenvolve Expourense na dinamización económica da provincia. Na súa intervención, Vázquez Abeal sinalou que o recinto é capaz de congregar a miles de persoas cada ano en eventos de relevancia internacional. Así, na décima edición de Funergal, que se celebra hoxe e mañá, participan 111 expositores de 14 países. No marco de Funergal, ponse en marcha unha misión comercial inversa que trae a feira a importadores de Brasil, Colombia e Guatemala, países en pleno proceso de modernización do sector e que teñen ás empresas galegas e españolas como referentes. A directora xeral de Comercio e Consumo lembrou que, co obxectivo de continuar a impulsar a actividade feiral ao tempo que se favorece a multifuncionalidade do recinto, a Xunta vai investir preto dun millón de euros en Expourense. Así, a achega da Consellería de Economía, Emprego e Industria permitirá ampliar o aforo da pista de atletismo hidráulica ata as 1500 persoas coa instalación de novas gradas, o que permitirá acoller competicións de maior prestixio; e incrementar o espazo expositivo en 400 m2, de forma que se poidan celebrar de xeito simultáneo no tempo actuacións deportivas e de carácter feiral. As obras, que se prevén executar este ano, realizaranse mediante un convenio de colaboración con Expourense. Este acordo tamén comprende melloras na eficiencia enerxética do edificio, así como a instalación de diverso equipamento de imaxe e proxección. Máis información
  • 08 Novembro, 2018
    A Xunta destaca en Ourense a aposta do comercio de proximidade polas novas tecnoloxías para chegar a nova clientela
    Comerciantes e artesáns desenvolverán 313 actuacións de implantación ou actualización de páxinas web comerciais e de mellora da imaxe en liña. Así mesmo, poñeranse en marcha 63 iniciativas centradas na loxística dixital ou a implantación de packaging para venda en liña. Doutra banda, activaranse 144 proxectos de ferramentas de xestión, e modernizaranse 112 locais. Ademais, a través desta mesma orde de axudas, máis de 100 comercios contan co asesoramento dun xestor de redes sociais para desenvolver novas fórmulas de promoción e comercialización en internet, no marco do programa de Social Commerce que se desenvolve en colaboración coa Federación Galega de Comercio. O obxectivo desta iniciativa é potenciar a presenza do comercio galego de proximidade nas redes sociais, impulsando a súa conexión co cliente e creando novas redes de fidelización e imaxe de marca, buscando adaptar o comercio de proximidade ás novas tendencias do mercado. Estas axudas enmárcanse no Plan Estratéxico de Impulso ao Comercio de Galicia, que ten entre os seus retos o establecemento dun novo modelo de comercio intelixente que sitúe ao cliente no centro da súa estratexia aproveitando todos os recursos á súa disposición. Máis información
  • 07 Novembro, 2018
    A Xunta apoia con 80.000 euros o labor que desenvolven as asociacións de comerciantes da zona sur de Lugo no impulso á competitividade do sector
    A Consellería de Economía, Emprego e Industria vén de conceder apoios por 80.000 euros ás asociacións de comerciantes de Monforte de Lemos e Chantada para o desenvolvemento dunha vintena de accións de dinamización comercial. O delegado territorial da Xunta en Lugo, José Manuel Balseiro, mantivo hoxe unha reunión de traballo en Monforte coa presidenta e o xerente do Centro Comercial Urbano, María José Senra e Ángel Folgueira respectivamente. Posteriormente desprazouse a Chantada, onde se reuniu con Néstor Quiroga, presidente do Centro Comercial Aberto, e a xerente Leticia Díaz. O obxectivo das xuntanzas foi coñecer o tipo de accións que desenvolven ambas entidades ao abeiro desta liña de axudas, que son de carácter anual; as actividades “benefician ás 300 empresas asociadas e ao conxunto dos veciños e veciñas, que son os destinatarios finais das campañas que se levan a cabo”, afirmou Balseiro. Así, o comercio de proximidade organiza en ambas localidades feiras de oportunidades, accións de fidelización e actividades de fomento das vendas en datas puntuais como o Nadal. Igualmente, axudan a mellorar a sinalización comercial e a formación dos empresarios do sector. Ademais, contribúen á dinamización social do entorno, ofrecendo oportunidades para o tempo de lecer. A modo de exemplo, a asociación chantadina organizou nos últimos meses a campaña Peque Chef para os nenos e nenas, e a de Monforte instalou temporalmente un rocódromo e unha tirolina. Balseiro sinalou que o respaldo ao asociacionismo comercial é unha das prioridades do Plan estratéxico de impulso ao Comercio de Galicia, que destina 70 millóns de euros ata 2020 a modernizar e incrementar a competitividade do comercio de proximidade galego, na procura de tres grandes retos: afianzar un sector comercial renovado, impulsar o smart commerce e o comercio electrónico, e potenciar o comercio excelente, traballando na dinamización e a mellora continua. Neste sentido, este programa de achegas contribúe a construír un sector comercial máis competitivo e dinámico fomentandoa revitalización dos centros comerciais abertos e a súa adaptación ao contorno, creando espazos confortables e de lecer para realizar compras que xeren polos de atracción comercial nas cidades e vilas. Máis información

  • Páxina 1 de 81

  • Mostrando do 1 ao 20 dun total de 1603 rexistros