Xunta de Galicia
Vostede está aquí:

Actualidade Comercial

  • 22 Maio, 2015
    Conde destaca que a nova app de realidade virtual do Mercado de Santiago contribuirá a reforzar o seu atractivo turístico

    Santiago, 22 de maio de 2015.- O conselleiro de Economía e Industria, Francisco Conde, destacou hoxe que a nova app de realidade virtual do Mercado de Santiago contribuirá a reforzar aínda máis o atractivo turístico desta infraestrutura tras a súa remodelación. Realizada polo CIS Galicia, que ten entre os seus obxectivos achegar estas tecnoloxías aos sectores estratéxicos da economía galega, a ferramenta presentada hoxe, coincidindo coa campaña Quere o teu mercado, permite realizar un paseo virtual pola praza e percorrer os seus recunchos desde calquera dispositivo Android.

    A aplicación formará parte dun proxecto máis amplo no que xa está a traballar a Consellería de Economía e Industria, a través do cal se ofrecerá información sobre todas as prazas galegas, así como dos mercados tradicionais.

    A praza de abastos de Santiago é unha das máis de 50 de toda Galicia que están a participar na campaña Quere o teu mercado, que se celebra en 16 países de Europa, América e Asia entre o 15 e o 30 de maio, e coa que a Xunta busca implicar a toda a sociedade no impulso ás prazas de abastos. En colaboración cos concellos, as federacións e asociacións de praceiros e a Federación Galega de Comercio póñense en marcha diferentes actividades lúdicas, que culminarán o 30 de maio coa celebración do Día do Mercado.

    Quere o teu mercado (Love Your Local Market), con orixe no Reino Unido, está promovido a nivel internacional pola World Union of Wholesale Markets, e este ano conta coa participación de mercados de España, Reino Unido, Francia, Alemaña, Holanda, Polonia, Italia, Irlanda, Bélxica, Grecia, Dinamarca, Suecia, Hungría, Serbia, Hong Kong e Estados Unidos.

    A iniciativa preséntase como unha divertida oportunidade para que xente de todas as idades e condicións celebren a cultura do mercado local, resaltando o papel que xogan as prazas na compra de produtos frescos e de calidade, na cultura, e a tradición, á vez que se incentiva a creación de novos negocios nos mercados. No marco de Quere o teu mercado, impúlsanse nas prazas galegas participantes actividades para os máis pequenos, actuacións musicais, e iniciativas nas redes sociais e na páxina web www.quereoteumercado.gal, entre outras.

    Máis información
  • 20 Maio, 2015
    A iniciativa da Xunta Facemos marca. Medrando cos artesáns achega a artesanía aos alumnos da Pablo Picasso para impulsar o emprendemento no sector

    A Coruña, 20 de maio de 2015.- A directora xeral de Comercio, Sol Vázquez Abeal, presentou hoxe na Escola de Artes e Superior de Deseño Pablo Picasso da Coruña o proxecto Facemos marca. Medrando cos artesáns, impulsado pola Consellería de Economía e Industria. Esta iniciativa busca impulsar o emprendemento no sector ao tempo que se contribúe á posta en valor do mesmo, incidindo na importancia social, económica, cultural, local e ambiental da artesanía.

    O proxecto, que conta coa implicación do sector artesán galego, iníciase cunha achega aos estudantes das especialidades artísticas co obxectivo de favorecer a incorporación á artesanía a futuros profesionais. A iniciativa iniciouse o pasado mes de marzo cunha achega aos estudantes das especialidades artísticas nunha xornada na EASD Mestre Mateo de Santiago, e despois do seu paso pola Pablo Picasso chegará ás escolas Antonio Faílde de Ourense e á Ramón Falcón de Lugo.

    Estes encontros contan coa participación de artesáns de diferentes oficios e localidades galegas que comparten as súas experiencias na aposta pola artesanía. Na xornada celebrada hoxe na Coruña participou o xoieiro Luis González Bahamonte, da empresa de Bergondo Ardentía.

    Nestas xornadas difúndense os beneficios vinculados á obtención da carta de artesán, divúlganse os oficios artesanais e a marca Artesanía de Galicia, e complementaranse con cursos formativos en diversas técnicas artesanais, onde os estudantes xunto cos artesáns profesionais establecerán un contacto directo.

    Dentro do proxecto Facemos marca. Medrando cos artesáns tamén se levarán a cabo diferentes accións dirixidas ao público en xeral, como conferencias, seminarios, e obradoiros para poñer en valor a importancia do slow made.

    Este proxecto encádrase dentro do Plan de Artesanía de Galicia, que ten por obxectivo conseguir un sector artesán sólido e sostible no tempo e que contribúa ao crecemento da economía galega, incidindo na competitividade empresarial e a potenciación do talento galego.

    Máis información
  • 15 Maio, 2015
    A Praza de abastos da Pobra súmase á campaña internacional Quere o teu mercado

    A Pobra do Caramiñal (A Coruña), 15 de maio de 2015.- A directora xeral de Comercio, Sol Vázquez Abeal, visitou hoxe a praza de abastos da Pobra do Caramiñal con motivo da campaña internacional Quere o teu mercado, que se celebra ata o 30 de maio en 16 países de Europa, América e Asia. A Consellería de Economía e Industria impulsa a celebración por primeira vez na comunidade desta iniciativa apoiando diferentes actividades de dinamización en máis de 50 prazas de abastos de toda Galicia, en colaboración cos concellos, as federacións e asociacións de praceiros e a Federación Galega de comercio. Na comarca de Barbanza, participan tamén as prazas de Ribeira e Boiro.

    No marco de Quere o teu comercio desenvólvense por toda Galicia distintas propostas para visualizar e promocionar as prazas como pezas clave do comercio de proximidade. Entre as actuacións específicas promovidas pola Xunta xunto co sector celebrarase en todas as prazas de abastos participantes o vindeiro sábado 30 de maio o Día do Mercado, poñendo en valor a calidade e a profesionalidade das prazas galegas. Ademais, impulsaranse actividades para os máis pequenos, actuacións musicais, e iniciativas nas redes sociais e na páxina web www.quereoteumercado.gal, entre outras.

    Quere o teu mercado (Love Your Local Market), con orixe no Reino Unido, está promovido a nivel internacional pola World Union of Wholesale Markets, e este ano conta coa participación de mercados de España, Reino Unido, Francia, Alemaña, Holanda, Polonia, Italia, Irlanda, Bélxica, Grecia, Dinamarca, Suecia, Hungría, Serbia, Hong Kong e Estados Unidos.

    A iniciativa preséntase como unha divertida oportunidade para que xente de todas as idades e condicións celebren a cultura do mercado local, resaltando o papel que xogan as prazas na compra de produtos frescos e de calidade, na cultura, e a tradición, á vez que se incentiva a creación de novos negocios nos mercados.

    O apoio ás prazas de abastos é un dos eixos da estratexia específica de impulso ao sector comercial da Xunta, que traballa co obxectivo de consolidalas como líderes na venda de produtos frescos e de calidade e impulsar a súa excelencia con novos e mellores servizos para os consumidores.

    Máis información
  • 04 Maio, 2015
    Francisco Conde destaca que o novo Consello Galego de Economía e Competitividade será a "canle estable de diálogo e consenso” na política industrial de Galicia

    Santiago, 4 de maio de 2015.- O conselleiro de Economía e Industria, Francisco Conde, destacou hoxe que o novo Consello Galego de Economía e Competitividade será a “canle estable de diálogo e de consenso” na política industrial de Galicia, coa vontade de que sirva para facilitar a participación dos axentes económicos e sociais na elaboración das diferentes políticas industriais e económicas da Xunta. Conde presidiu a constitución deste novo órgano, que nace como paso previo á aprobación definitiva da Axenda da Competitividade Galicia-Industria 4.0, e que aglutina aos diferentes consellos que a Consellería tiña ata o de agora, de acordo coas previsións da Lei do Emprendemento e da Competitividade de Galicia.

    O consello, resaltou Conde, contará con varias funcións: formular propostas, asesorar á administración, e informar sobre anteproxectos de lei e proxectos de regulamento, así como sobre a Axenda da Competitividade Galicia Industria 4.0. “Vai permitir unha maior coherencia nas diferentes actuacións da Xunta, e sobre todo sirve á vontade da Xunta de que as políticas industriais sexan dos galegos e para os galegos”, incidiu, sumando neste consello a preto de 40 representantes da administración, empresas, patronal, sindicatos, universidades, colexios profesionais, comerciantes, e expertos. Máis alá do pleno do consello, resaltou o conselleiro, o órgano conta con comités executivos sectoriais de política industrial, enerxía, emprendemento, competitividade e internacionalización, comercio interior e exterior, e desenvolvemento mineiro.

    Como primeira iniciativa do Consello Galego de Economía e Competitividade, hoxe púxose en común a Axenda da Competitividade Galicia Industria 4.0, que conforma un dos principais eixos da política industrial da Xunta, buscando incrementar o peso da industria no PIB galego ata o 20% e a creación de 50.000 novos empregos ata 2020. “A forma máis clara de poder crear emprego de calidade e que a nosa economía se poida consolidar” é apostar pola industria, dixo Conde.

    Un mapa para o futuro industrial de Galicia construído desde o consenso, para o que a Xunta ten recabado as aportacións de máis de 120 axentes. O documento está protagonizado pola fábrica intelixente nun ecosistema marcado polo equilibrio entre os nosos sectores tradicionais e emerxentes, a diversificación de produtos a partir da hibridación dos sectores punteiros, e a cultura da innovación e o emprendemento industrial.

    Conde resaltou que a Axenda Galicia Industria 4.0 actúa sobre cinco eixos estratéxicos que responden aos cinco grandes retos da industria galega: o aproveitamento dos factores territoriais que nos poidan facer más competitivos; impulsando a formación, talento o e emprendemento industrial; o impulso ao o financiamento para incrementar o tamaño das pemes, reforzando a colaboración entre sectores para hibridar produtos; a captación de talento, innovando e transferindo esa innovación á empresa; e oi impulso á internacionalización da economía.

    Máis información
  • 28 Abril, 2015
    Conde salienta que a Axenda Galicia-Industria 4.0 activará unha nova industria intelixente para “converter unha revolución global nunha oportunidade local”

    Santiago, 28 de abril de 2015.- O conselleiro de Economía e Industria, Francisco Conde, presentou esta tarde no Parlamento galego a Axenda da Competitividade Galicia-Industria 4.0, que cualificou como “unha axenda aberta e integradora que reflicte a colaboración público – privada” para poñer en práctica “unha nova industria intelixente, que sexa quen de converter unha revolución global nunha oportunidade local”.

    Conde apuntou que a tendencia da economía internacional se redirixe a reinventar a industria a través da fábrica intelixente e que a política industrial do Goberno galego busca adecuar as pemes galegas a esta realidade. Do mesmo xeito, sinalou que con esta Axenda a Xunta aposta por “fixar tecido industrial en Galicia por ser o sector que, historicamente, ten amosado crear máis emprego e de máis calidade”, fortalecendo o sector industrial e converténdoo no motor do crecemento da economía galega. Neste sentido, lembrou o dobre obxectivo que se fixa nesta folla de ruta: que a industria creza ata chegar ao 20% do PIB galego no ano 2020 e a creación de 50.000 novos empregos.

    Salientou o conselleiro que a Axenda da Competitividade Galicia-Industria 4.0 é a axenda dos máis de 120 axentes que colaboraron na súa elaboración, coas achegas do empresariado galego, en especial das industrias, así como de clústers e centros tecnolóxicos, entre outros.

    Medidas concretas
    Neste sentido incidiu Conde en que o diálogo iniciado levou a deseñar cinco grandes programas de impulso, con medidas concretas para responder a necesidades e obxectivos concretos. Estes programas refírense á mellora dos factores territoriais de competitividade; a máis organizacións profesionalizadas e máis persoas cualificadas; a afondar na capitalización e crecemento das empresas; a impulsar un compoñente de innovación maior e a ampliar os mercados.

    No primeiro programa, entre os compromisos da Axenda está facilitar solo industrial máis económico e mellor dotado, unha actuación xa en marcha a través da venda de solo industrial bonificado e á que se suma o apoio do Igape, que financiará ata o 40% do custo de proxectos empresariais a desenvolver neste solo industrial.

    Tamén lembrou o conselleiro de Economía e Industria dentro destes compromisos a simplificación normativa e a maior axilidade nas tramitacións administrativas. Neste ámbito, fixo fincapé en medidas como a eliminación das licencias municipais de apertura e o decreto para facilitar a posta en marcha de novas gasolineiras, que se complementarán coa posta en marcha dunha oficina doing business en Galicia, unha plataforma pública na Internet para atender as denuncias sobre obstáculos e propoñer suxestións.

    Puxo o acento ademais no talento e a excelencia tecnolóxica e organizativa, sinalando entre outros aspectos que se vai facilitar o coñecemento dos modelos e as tecnoloxías para a fábrica intelixente. Indicou, así mesmo, que se potenciará o emprendemento industrial, co foco nos sectores de gran potencial e a creación de startups. Tal e como detallou Conde, coa Axenda búscase apuntalar o crecemento e o tamaño das pemes a través de diferentes liñas de financiamento, poñendo como exemplo a nova liña de préstamos do BEI, que permitirá destinar 135 millóns de euros a apoiar o circulante.

    No cuarto programa, tal e como explicou o conselleiro de Economía e Industria, recóllense as medidas para crear valor e deseñar o modelo galego de fábrica intelixente, favorecendo proxectos innovadores, impulsando a transferencia de resultados ao mercado e a captación de fondos públicos e privados. Ademais, apoiaranse aspectos relacionados coa internacionalización da fábrica intelixente, impulsando novas formas para atraer investimentos e apostando por novos mercados e a diversificación.

    En liña con Europa
    Na súa intervención ante o pleno da Cámara, Conde incidiu en que a planificación que se recolle na Axenda Galicia-Industria 4.0 se enmarca no Horizonte 2020, e vai en liña coas directrices da Unión Europa, ao igual que se fixo co Estratexia de Especialización Intelixente (RIS3) e a Estratexia de Internacionalización da Empresa Galega.

    Asegurou Conde que é unha “Axenda ambiciosa da industria galega para a industria galega” e apuntou que este é o compromiso do Goberno galego e del se deu conta na elaboración do programa operativo Feder Galicia 2.014-2020, apuntando que a gran maioría dos 883 millóns de euros que se recibirán deste fondo europeo irán a promover a economía do coñecemento.

    Conde remarcou que a Industria 4.0 non é excluínte, que “se trata dunha nova forma de abordar os procesos industriais e crear valor a través da tecnoloxía e a innovación” e que “é moito máis que robots e máquinas”. Neste sentido, asegurou que “o modelo de fabrica intelixente é para todos e resultará determinante tanto para as industrias máis avanzadas e cun alto compoñente tecnolóxico como para as industrias máis tradicionais e pequenas”.

    Foco nas pemes
    Así, asegurou que Galicia ten un tecido produtivo baseado nas pequenas empresas, polo que a Axenda ten o foco nas medidas para atender as súas necesidades concretas, sen esquecer as grandes empresas polo seu efecto tractor na economía e pola súa contribución á imaxe de Galicia.

    Do mesmo xeito, Conde explicou que a Axenda Galicia-Industria 4.0 buscará “fortalecer todos os sectores produtivos para crecer e crear emprego”, tanto estratéxicos como emerxentes, e especificou no eido do naval 4.0 que a Xunta xa ten un acordo de 2 millóns de euros con empresas e centros de investigación galegos para impulsar tecnoloxías innovadoras.

    O conselleiro de Economía e Industria sinalou que o modelo de Industria 4.0 é unha “realidade incuestionable que non podemos nin debemos rexeitar”, na que están avanzando países como Alemaña, Estados Unidos, Reino Unido ou Corea do Sur, apuntando así mesmo que o País Vasco e outras rexións europeas teñen tamén a atención posta neste modelo, e recordou que xa hai empresas galegas que se están “preparando para estar no grupo de cabeceira da Industria 4.0 en Europa e exercer un efecto tractor no tecido industrial galego”.

    Máis información
  • 27 Abril, 2015
    Estudantes de Betanzos aprenden a obter seda da man do proxecto Enredando, artesanía na escola

    Betanzos (A Coruña), 27 de abril de 2015.- O CEIP Franscico Vales Vilamarín de Betanzos acolleu hoxe o proxecto Enredando, artesanía na escola, que pon en marcha a Consellería de Economía e Industria a través da Fundación Centro Galego da Artesanía e do Deseño e que durante este trimestre está a permitir a alumnos de 16 colexios de toda Galicia aprender a obter seda. O obxectivo desta iniciativa é achegar aos máis novos os oficios artesanais, contribuíndo así á promoción e posta en valor do sector artesán galego, unha das liñas de acción do novo Plan de Artesanía de Galicia.

    Coa segunda parte da unidade didáctica O gremio da seda, que vén de pasar por outros tres centros da provincia (o CEIP Oza dos Ríos de Oza- Cesuras, o CEIP de Teixeiro, en Curtis, e o CEIP de Présaras, en Vilasantar), o alumnado que xa participara anteriormente no proceso de coidado e a evolución dos vermes da seda coñece da man de artesáns expertos a extracción desta para a confección do fío de seda.

    Enredando, artesanía na escola conta tamén cunha unidade didáctica centrada na elaboración e encadernado de papel, Do papel ao libro, para alumnado de 3º ciclo de primaria e 1º ciclo de secundaria, cuxo comezo está previsto no vindeiro mes de maio

    Os principais obxectivos deste proxecto, que conta coa colaboración da Consellería de Cultura, Educación e Ordenación Universitaria, son concienciar a sociedade do valor do produto feito a man, así como presentarlle aos rapaces e rapazas que a artesanía pode ser tamén unha boa alternativa para o seu futuro laboral. Tamén impulsar o relevo xeracional nos oficios máis tradicionais promovendo o desenvolvemento da artesanía galega a través da formación de futuros artesáns creadores; e amosar á sociedade o valor engadido da artesanía en canto á súa creatividade, patrimonio cultural e tradición.

    Contribúese así á posta en valor do sector artesán, unha das liñas de acción do Plan de Artesanía de Galicia, co obxectivo de conseguir un sector artesán sólido e sostible no tempo e que contribúa ao crecemento da economía galega, incidindo na competitividade empresarial e a potenciación do talento galego.

    Máis información
  • 20 Abril, 2015
    Economía e Industria impulsa un pop-up de pezas de Artesanía de Galicia no casco histórico de Santiago de Compostela

    Santiago, 20 de abril de 2015.- A Consellería de Economía e Industria, a través da Fundación Centro Galego da Artesanía e do Deseño, está a impulsar un pop-up ou evento temporal de promoción e venda de artesanía que se desenvolve na tenda de decoración e interiorismo Myka, nos arredores da Praza de Abastos de Santiago, coincidindo coa celebración do evento Compostela Gastronómica.

    Esta iniciativa de carácter temporal, que foi visitada hoxe pola directora xeral de Comercio, Sol Vázquez Abeal, ten por obxectivo contribuír á visibilización do produto artesán galego e á posta en marcha de novas fórmulas de comercialización da artesanía. Encádrase dentro do Plan de Artesanía de Galicia, que ten por obxectivo conseguir un sector artesán sólido e sostible no tempo e que contribúa ao crecemento da economía galega, incidindo na competitividade empresarial e a potenciación do talento galego.

    A escolma de produtos que están presentes neste espazo dedicado á decoración e ao interiorismo centra o valor da artesanía na súa diferenza: deseño, baixa pegada ecolóxica, cohesión co territorio e patrimonio cultural, ocupando a artesanía galega o seu propio lugar en consonancia con outros obxectos doutras características e procedencia.

    A mostra está formado por pezas de madeira, cerámica, téxtiles, cestería tradicional e contemporánea, elaborados por 19 obradoiros artesanais de toda Galicia. Os visitantes poderán ver pezas dos talleres téxtiles de Concha Canoura (Culleredo), Taller Arbor (Vilamarín), Centro de Recuperación de Cultura Popular (Ponteareas), Artefíos (A Coruña), Anna Champeney (A Teixeira).

    As pezas de cerámica están elaboradas por Alfarería Lista (Malpica de Bergantiños), Regal Cerámica (Viveiro), Carmen Labrador (Malpica de Bergantiños), Cerámica Unzueta (Brión), Cerámica Suve (Cangas), Lucía Catuxo Cerámica (Trabada), Victor Ares (A Coruña).

    A madeira está representada por pezas de Armaior (Quiroga), Atalanta Madera (A Estrada), Elena Ferro (Vila de Cruces), Taxus (Vilarmaior). Zimzelatum (Gondomar) expón pezas en metal cicelado, Antonio Suárez Dávila (Vigo) cestería tradicional e Idoia Cuesta (Outeiro de Rei), pezas de cestería contemporánea con fibras téxtiles.

    Máis información
  • 15 Abril, 2015
    Estudantes pontevedreses implícanse na innovación do sector comercial na iniciativa da Xunta "Comercio con talento"

    Pontevedra, 15 de abril de 2015.- A directora xeral de Comercio, Sol Vázquez Abeal, presentou hoxe aos alumnos do IES Luís Seoane de Pontevedra a nova iniciativa da Xunta Comercio con talento, que ten por obxectivo impulsar a innovación e o emprendemento no sector comercial, ao tempo que se promove o coñecemento e o contacto do alumnado de formación profesional co sector e a súa realidade, complementando así a súa formación.

    Tal e como se salientou na xornada, na que participou o presidente do centro comercial aberto Zona Monumental, Miguel Lago, a iniciativa, que se está a desenvolver en centros de toda Galicia, vai dirixida ao alumnado do ciclo formativo de grao medio de Comercio e ao de grado superior de Xestión comercial e marketing. Os estudantes dos centros participantes, que traballarán en grupos de catro persoas, deberán propoñer antes do 5 de xuño a candidatura do comercio que, ao seu xuízo, sexa o máis innovador da súa zona, seguindo determinados criterios.

    Explicou Vázquez Abeal que un xurado especializado escollerá ao negocio gañador en cada área, e os alumnos que propuxeran a súa candidatura recibirán premios para mercar no comercio local. Posteriormente, cada establecemento elixido recibirá un recoñecemento público, e participará en diferentes iniciativas que se poñerán en marcha para difundir boas prácticas no sector comercial.

    A iniciativa Comercio con talento, que conta coa colaboración de Abanca e na que está previsto que participen máis de 700 alumnos de 16 localidades diferentes de toda Galicia, compleméntase cun concurso de fotografía que se desenvolve no portal do comerciante (portaldocomerciante.xunta.es) co que se convida á cidadanía a reflexionar sobre o talento nos establecementos, en eidos como o escaparatismo, a selección de produtos á venda ou o packaging. Poderán enviarse fotografías ata o vindeiro 31 de maio, e a publicación das mesmas e as votacións por parte do público serán no mes de xuño. Os seis primeiros clasificados recibirán tamén premios para mercar no comercio local.

    Máis información
  • 08 Abril, 2015
    Estudantes de Caldas de Reis implícanse na innovación do sector comercial na iniciativa da Xunta Comercio con talento

    Caldas de Reis (Pontevedra), 8 de abril de 2015.- A directora xeral de Comercio, Sol Vázquez Abeal, presentou hoxe aos alumnos do CPR San Fermín de Caldas de Reis a nova iniciativa da Xunta Comercio con talento, que ten por obxectivo impulsar a innovación e o emprendemento no sector comercial, ao tempo que se promove o coñecemento e o contacto do alumnado de formación profesional co sector e a súa realidade, complementando así a súa formación.

    Tal e como se salientou na xornada, a iniciativa, que se está a desenvolver en centros de toda Galicia, vai dirixida ao alumnado do ciclo formativo de grao medio de Comercio e ao de grado superior de Xestión comercial e marketing. Os estudantes dos centros participantes, que traballarán en grupos de catro persoas, deberán propoñer antes do 5 de xuño a candidatura do comercio que, ao seu xuízo, sexa o máis innovador da súa zona, seguindo determinados criterios.

    Explicou Vázquez Abeal que un xurado especializado escollerá ao negocio gañador en cada área, e os alumnos que propuxeran a súa candidatura recibirán premios para mercar no comercio local. Posteriormente, cada establecemento elixido recibirá un recoñecemento público, e participará en diferentes iniciativas que se poñerán en marcha para difundir boas prácticas no sector comercial.

    A iniciativa Comercio con talento, que conta coa colaboración de Abanca e na que está previsto que participen máis de 700 alumnos de 16 localidades diferentes de toda Galicia, compleméntase cun concurso de fotografía que se desenvolve no portal do comerciante (portaldocomerciante.xunta.es) co que se convida á cidadanía a reflexionar sobre o talento nos establecementos, en eidos como o escaparatismo, a selección de produtos á venda ou o packaging. Poderán enviarse fotografías ata o vindeiro 31 de maio, e a publicación das mesmas e as votacións por parte do público serán no mes de xuño. Os seis primeiros clasificados recibirán tamén premios para mercar no comercio local.

    Máis información
  • 02 Abril, 2015
    Máis de mil escolares galegos participan no concurso de consumo responsable Consumópolis

    Santiago, 2 de abril de 2015.- Máis de mil escolares galegos de primaria e secundaria están a participar no concurso de consumo responsable Consumópolis, coordinado en Galicia polo Instituto Galego de Consumo, dependente da Consellería de Economía e Industria, en colaboración coa Consellería de Cultura, Educación e Ordenación Universitaria.

    Tras completar a primeira etapa, consistente nun percorrido dun xogo on-line sobre consumo responsable e calidade de vida, máis de 200 equipos de toda a comunidade están a traballar xa na segunda fase do certame, que nesta edición leva o lema O teu consumo ten historia: 10 anos de Consumópolis e 30 anos de consumo. Ponse así o foco sobre os cambios nos hábitos de consumo, conmemorando os 10 anos que ten xa o concurso e os 30 anos da entrada en vigor da Lei estatal para a defensa dos consumidores e usuarios.

    O alumnado ten que elaborar antes do 6 de abril un traballo en grupos de cinco coordinados por un docente, que consiste na elaboración dun cartel que compare dúas formas de consumo do pasado e do presente.

    Na fase autonómica establécense tres categorías por idades, con premios para os tres primeiros clasificados en cada unha delas que veñen de ser convocados a través do Diario Oficial de Galicia.

    Máis información
  • 02 Abril, 2015
    Economía e Industria activa unha app para dar a coñecer os produtos amparados pola marca Galicia Calidade

    Santiago, 2 de abril de 2015.- A Consellería de Economía e Industria vén de activar unha aplicación móbil de Galicia Calidade para dar a coñecer aos consumidores todos os produtos e servizos amparados pola marca de garantía. Con esta ferramenta, dispoñible para a súa descarga gratuíta, o cidadán poderá comprobar no punto de venda se un produto conta co distintivo. Ademais, tamén facilitará outros datos de interese tanto das empresas certificadas como de Galicia Calidade.

    Desta forma, a app configúrase como unha forma de achegar ao consumidor final toda a información relativa aos produtos certificados por Galicia Calidade. Así, o usuario contará cun factor distintivo no punto de venda, diferenciando a través da app a orixe xeográfica e o concepto de calidade ligados a estes produtos. Neste sentido, a marca de garantía representa o compromiso das empresas galegas por ofrecer os mellores produtos e servizos, e o uso das mellores prácticas para a produción, a elaboración e a comercialización, podendo resultar un factor determinante á hora da elección dun produto.

    Os usuarios que descarguen a aplicación poderán, así mesmo, atopar toda a actualidade de Galicia Calidade e das empresas certificadas. Ademais, tamén poderán consultar, dun xeito cómodo e accesible, distintos datos de interese relativos ás compañías, como a súa localización, ligada ao navegador móbil, os datos de contacto, ou o acceso aos seus perfís públicos en redes sociais, entre outros.

    Galicia Calidade conta na actualidade con máis de 250 produtos e servizos certificados, un factor que fai decisiva a posta en marcha de ferramentas como esta app, que permitirá coñecer e diferenciar os mellores produtos galegos que contan coa marca de garantía.

    Máis información
  • 01 Abril, 2015
    A Xunta destaca a relevancia da mostra do encaixe de Camariñas como referente de dinamización do sector artesán galego

    Camariñas (A Coruña), 1 de abril de 2015.- A directora xeral de Comercio da Consellería de Economía e Industria, Sol Vázquez Abeal, salientou esta tarde na XXV Mostra do Encaixe de Camariñas a relevancia deste encontro como referente de dinamización do sector artesán galego, así como escaparate da marca Artesanía de Galicia.

    Camariñas é clave no papel que xoga a artesanía como atractivo diferenciador da oferta turística de Galicia e como vehículo para proxectar a imaxe de Galicia no exterior. A Mostra, que cumpre nesta edición 25 anos, está a consolidarse como punto de encontro para emprendedores artesáns, apostando pola innovación sen perder as raíces e os valores que caracterizan ao produto artesán galego.

    Nesta edición a Mostra do Encaixe de Camariñas conta coa participación de doce delegacións internacionais procedentes de Alemaña, Brasil, Bélxica, Bulgaria, Estonia, Francia, Italia, Polonia, Portugal, República Checa, Rusia e Suíza. O programa de actividades inclúe diferentes desfiles coas creacións de trinta deseñadores noveis e a colaboración de firmas de moda de recoñecido prestixio como Lorenzo Caprile, Devota & Lomba ou Franco Quintáns, entre outros.

    Ademais do encaixe, nesta Mostra, que conta co apoio da Consellería de Economía e Industria, pódense atopar outros oficios da artesanía galega grazas aos puntos de venda de artesáns xoieiros, téxtiles, do vidro e de bixutería. Artesanía de Galicia conta cun espazo propio para a promoción da marca e do sector artesán.

    Máis información
  • 30 Marzo, 2015
    Conde salienta que a reforma da praza de abastos de Vilagarcía "dará un novo pulo a un dos centros neurálxicos da vila"

    Vilagarcía de Arousa (Pontevedra), 30 de marzo de 2015.- O conselleiro de Economía e Industria, Francisco Conde, sinalou esta tarde en Vilagarcía de Arousa que a reforma do mercado de abastos da localidade lle dará un novo pulo a un dos centros neurálxicos da vila, contribuíndo á dinamización económica do concello.

    Conde, que asinou co alcalde vilagarcián, Tomás Fole, un acordo de colaboración polo que a Xunta se compromete a achegar 240.000 euros para as melloras que se van poñer en marcha no mercado, sinalou que se trata dunha actuación moi importante para Vilagarcía na que se espera que se impliquen todas as partes, e remarcou os beneficios para praceiros, comerciantes en xeral e cidadanía.

    Neste sentido, o conselleiro remarcou que a Xunta aposta polas prazas de abastos como verdadeiros centros de negocios con espazo e servizos comúns para todos os que nelas desenvolven a súa actividade; como eixos vertebradores para todo o sector comercial; e como un auténtico servizo público, achegando os mellores produtos, converténdose nun referente da cultura e do patrimonio, e unha mostra do que Galicia pode ofrecerlle aos seus visitantes.

    Os mercados teñen un valor estratéxico para o comercio de proximidade, e por iso a Consellería de Economía e Industria facilitou nos últimos anos actuacións en máis de 80 mercados, con apoios que superan os 17 millóns de euros. Ademais, estase a traballar na posta en marcha da Rede de Mercados Excelentes.

    O apoio ás prazas de abastos é un dos eixes específicos da estratexia de apoio ao sector comercial da Xunta, que no que levamos de ano leva activados programas de apoio por 7,6 millóns de euros, centrados ademais de no impulso aos concellos na mellora dos mercados, no apoio ao asociacionismo comercial, a innovación e a modernización.

    Máis información
  • 28 Marzo, 2015
    A Xunta apoia a posta en valor do produto artesán na iniciativa oficios en acción na Coruña

    A Coruña, 28 de marzo de 2015.- A directora xeral de Comercio, Sol Vázquez, visitou hoxe na Coruña Oficios en Acción, unha iniciativa participativa relacionada con oito oficios artesanais coa que se impulsa a posta en valor do produto artesán galego no marco dos Días Europeos da Artesanía.

    Organizada pola Concellaría de Cultura do Concello da Coruña, a mostra conta coa colaboración da Consellería de Economía e Industria, a través da Fundación Centro Galego da Artesanía e do Deseño; así como da Asociación Galega de Artesáns, gañadora recentemente do Premio Nacional de Artesanía para Entidades Privadas.

    Este ano os talleres sobre os diferentes oficios artesanais instálanse nos Xardíns de Méndez Núñez (fronte ao Kiosco Alfonso). Durante as xornadas de hoxe e do domingo, en horario de 10:00 a 14:00 e de 16:00 a 20:00 horas, oito artesáns póñense á disposición do público para explicar cales son os procedementos básicos en cada un deles. Desta forma, o visitante poderá acceder a cada taller, intervir nas accións programadas, preguntar, e, por suposto, participar.

    A Consellería de Economía e Industria participa na celebración dos Días Europeos da Artesanía, que se celebran ata o domingo 29 de marzo, con diferentes iniciativas de promoción da artesanía galega na nosa comunidade. Trátase dunha iniciativa promovida en España pola Fundación Española para la Innovación de la Artesanía (Fundesarte) e no que a Xunta colabora por cuarto ano consecutivo, baixo o que terán lugar toda unha serie de actividades relacionadas co sector artesán.

    Inspirada nas Journées des métiers d’art, desenvolvidas en Francia desde 2002, a convocatoria pretende obter unha participación cada vez máis ampla de países da Unión Europea. Dez países tomarán parte este ano na celebración, Alemaña, Bélxica, Francia, Italia, Reino Unido, Letonia, Suíza, Hungría, Portugal e España.

    Entre as diferentes iniciativas que se desenvolven deste este venres, varios obradoiros abren as súas portas ao público e ofrecen diferentes actividades. Hoxe e mañá domingo, de 11:00 a 20:00 horas, a ourive Susi Gesto ofrece aos visitantes ao seu taller na zona vella de Compostela participar e traballar coa artesán nunha xornada habitual de traballo, o que lles permitirá formar parte nos diferentes procesos de creación artesanal. A xornada, dirixida a un máximo de oito persoas inscritas previamente, distribuirase en dúas quendas, de mañá e de tarde.

    A artesá Paz Carro abre en Ourense o seu taller especializado na elaboración de beléns, miniaturas e maquetas, para celebrar os Días Europeos da Artesanía. O taller estará aberto ao público hoxe e o domingo en horario de 12:00 a 18:00 horas, previa cita. Tamén en Ourense, a artesá téxtil Concha Outeiriño abre as portas do seu obradoiro para ensinar o manexo dun tear, dende a preparación da urdime ata a montaxe no tear e a tecedura dunha peza. Os horarios son hoxe de 10:00 a 17:00 horas e mañá de 10:00 a 13:00 horas.

    Portas abertas no obradoiro Olería Aparicio en Buño
    Hoxe e mañá neste obradoiro de olería de Buño, os visitantes poderán presenciar demostracións en vivo, unha mostra das ferramentas e os materiais cos que traballan para elaborar as súas prezadas pezas e moitas actividades máis. O horario de visita é de 10:00 a 20:00 para hoxe e de 10:00 a 14:00 o domingo.

    XII Encontro de Palilleiras Concello de Cervo
    Tamén no marco dos Días Europeos da Artesanía hoxe celébrase no pavillón polideportivo municipal de San Cibrao, en Cervo (Lugo), o XII Encontro de Palilleiras Concello de Cervo, un dos máis coñecidos a nivel autonómico e no que están inscritas máis de 800 palilleiras procedentes de distintos puntos da provincia de Lugo, Vigo, A Coruña, Ferrol, Pontevedra, Ourense, Asturias, Castela e León e Cantabria.


    Toda a información, horarios e localización destas actividades poden ser consultadas na páxina web www.diasdelaartesania.es

    Máis información
  • 26 Marzo, 2015
    Economía e Industria promove a posta en valor do produto artesán galego con distintas actividades nos ‘Días Europeos da Artesanía’

    Santiago de Compostela, 26 de marzo de 2015.- A Consellería de Economía e Industria participa na celebración dos “Días Europeos da Artesanía”, desde mañá, venres 27, ao domingo 29 de marzo, con diferentes iniciativas de promoción da artesanía galega na nosa comunidade. Trátase dunha iniciativa promovida en España pola Fundación Española para la Innovación de la Artesanía (Fundesarte) e no que a Xunta colabora por cuarto ano consecutivo, baixo o que terán lugar toda unha serie de actividades relacionadas co sector artesán.

    Inspirada nas Journées des métiers d’art, desenvolvidas en Francia desde 2002, a convocatoria pretende obter unha participación cada vez máis ampla de países da Unión Europea. Dez países tomarán parte este ano na celebración, Alemaña, Bélxica, Francia, Italia, Reino Unido, Letonia, Suíza, Hungría, Portugal e España. As actividades que se organizan en Galicia son as seguintes:

    Oficios en acción
    É unha iniciativa de carácter participativo relacionada con oito oficios artesanais, organizada pola Concellaría de Cultura do Concello da Coruña, en colaboración coa Fundación Centro Galego da Artesanía e do Deseño e a Asociación Galega de Artesáns, gañadora recentemente do Premio Nacional de Artesanía para Entidades Privadas. Este ano os talleres sobre os diferentes oficios artesanais instálanse nos Xardíns de Méndez Núñez (fronte ao quiosco Alfonso). Durante as xornadas do sábado e do domingo, en horario de 10:00 a 14:00 e de 16:00 a 20:00 horas, oito artesáns poñeranse á disposición do público para explicar cales son os procedementos básicos en cada un deles. Desta forma, o visitante poderá acceder a cada taller, intervir nas accións programadas, preguntar, e, por suposto, participar.

    Inclúense talleres de cerámica de torno da man de Cerámica Unzueta (Brión) que presenta un programa demostrativo e moi participativo aberto a todos os públicos e, en particular, aos máis pequenos. O ceramista Nano Unzueta ofrecerá un percorrido práctico pormenorizado por todos os procesos de produción de obxectos no torno, dende a preparación do barro ata a montaxe final das pezas.

    Tamén haberá espazo para pastas cerámicas, con Cerámic – chef, impartido por Terralume (A Coruña), unha proposta para descubrir como un oficio milenario como a cerámica emprega terras e minerais dos nosos solos, grazas a unha ampla variedade de pastas de distintas propiedades. A ceramista Susana González traballará con dous niveis de participación: sesións de catro horas para oito persoas previamente inscritas, que elaborarán unha bandexa- neriage e dirixirán a creación dun mural colectivo; e outro nivel dirixido a participacións puntuais.

    Así mesmo, haberá un obradoiro de ourivaría tradicional dirixido polo taller Plata Nativa (Sada). Gustavo Helling propón tamén dúas fórmulas de participación, en ambos os dous casos para maiores de 15 anos: a primeira en sesións de dúas horas, segundo grao de habilidade, para catro persoas inscritas previamente e, a segunda, para participacións máis breves de ata 45 minutos. Os asistentes introduciranse nas técnicas básicas da xoiería e terán a oportunidade de realizar un obxecto de uso persoal.

    A cestería contemporánea chegará da man da artesá Idoia Cuesta (Outeiro de Rei), que acaba de resultar gañadora do Premio Nacional de Artesanía na categoría “Produto”, pola súa última colección. O taller permite tamén dúas posibilidades de participación: sesións de catro horas para catro persoas previamente inscritas e tamén sesións breves de 30 minutos. Será unha introdución aos tipos de cestería tanto con fibras vexetais como con tecidos.

    O tallar de Vidreira chumbada será impartido polo artesán Polo Enríquez (A Coruña), que introducirá aos interesados nalgúns dos segredos desta complexa técnica secular. O seu programa inclúe tamén sesións de catro horas para catro interesados inscritos previamente e sesións máis curtas segundo a dispoñibilidade dos participantes.

    Haberá arte floral a cargo de Beate Méndez, de Floriforma (Teo), que achegará os asistentes a este oficio tan meticuloso e detallista como espectacular. A artesá ofrece tamén dúas posibilidades para os interesados: sesións de dúas horas para un máximo de oito persoas inscritas previamente, a ta materializar unha proposta de certa complexidade, e sesións abertas de 30 minutos nas que os asistentes prepararán tamén unha peza completa.

    Ademais, o artesán Xoán Manuel Tubío, de Outeiro de Rei, ofrecerá demostracións prácticas dos diferentes procesos de construción de instrumentos de percusión, de zanfonas e doutros instrumentos tradicionais, así como a posibilidade de elaborar algunhas mostras do noso rico patrimonio cultural: unhas tarrañolas para adultos ou sinxelos xoguetes sonoros para nenos de todas as idades a partir de cascas de noz.

    Un dos obradoiros centrarase en tapiz 3D e xoiería téxtil macramé impartido por Tapices de Galicia (A Coruña). A artesá téxtil Josefina Sedes ofreceralle aos interesados dúas áreas de traballo diferentes: xoiería téxtil a partir de técnicas de micromacramé, Kumihimo (trenzado xaponés) e iniciación ao tapiz 3D sobre bastidores individuais prefabricados para tecer un pequeno tapiz con la de diferentes grosores e texturas. Os participantes poden traballar en sesións de catro horas, máximo oito participantes inscritos previamente, e achegamentos puntuais de unha hora de duración.

    Portas abertas no taller de Susi Gesto en Santiago de Compostela
    O sábado e o domingo, de 11:00 a 20:00 horas, a ourive Susi Gesto abre o seu obradoiro da zona vella de Santiago de Compostela ao público, durante os cales os asistentes poderán participar e traballar coa artesán nunha xornada habitual de traballo obradoiro, o que lles permitirá formar parte nos diferentes procesos de creación artesanal. A xornada, dirixida a un máximo de oito persoas inscritas previamente, distribuirase en dúas quendas, de mañá e de tarde.

    Portas abertas no obradoiro de Carro Artesanos en Ourense
    A artesá Paz Carro abre o seu taller especializado na elaboración de beléns, miniaturas e maquetas, para celebrar os Días Europeos da Artesanía. O taller estará aberto ao público o venres de 11:00 a 13:30 e o sábado e o domingo en horario de 12:00 a 18:00 horas, previa cita.

    Portas abertas no obradoiro Olería Aparicio en Buño
    Os días 27, 28 e 29 de marzo neste obradoiro de olería de Buño, os visitantes poderán presenciar demostracións en vivo, unha mostra das ferramentas e os materiais cos que traballan para elaborar as súas prezadas pezas e moitas actividades máis. O horario de visita é de 10:00 a 20:00 para venres e sábado e de 10:00 a 14:00 o domingo.

    Toda a información, horarios e localización destas actividades poden ser consultadas na páxina web www.diasdelaartesania.es.

    Máis información
  • 26 Marzo, 2015
    A Xunta investiu máis de 52.000 euros na mellora da praza de abastos de Boiro co obxectivo de convertela en dinamizadora da economía local

    Boiro (A Coruña), 26 de marzo de 2015.- A delegada territorial da Xunta na provincia, Belén do Campo, visitou hoxe a praza de abastos da localidade, na que veñen de realizarse melloras co fin de converter as instalacións en dinamizadoras da economía local e en referencia da venda de produto fresco e de calidade. Os traballos contaron cunha subvención por parte da Consellería de Economía e Industria de 52.951 euros, é dicir, o 75% do total do investimento.

    Na visita, na que estivo acompañada polo alcalde, Juan José Dieste, Do Campo sinalou que as reformas realizadas consistiron en crear un novo espazo cuberto dentro do propio recinto duns 500 metros cadrados de superficie para dar cabida a diversas actividades a prol do incremento das vendas e da atracción de visitantes. Así, procedeuse á demolición de algúns elementos de tabiquería en desuso para obter un espazo diáfano e abriuse un oco na fachada principal para a instalación dunha nova porta, que permite a conexión entre o mercado e o novo espazo. As obras completáronse coa colocación de falso teito e de pavimento antiesvarante.

    “O novo espazo habilitado permitirá levar a cabo iniciativas tan diversas como catas de produtos típicos, actividades para a participación de nenos ou de tipo cultural compatibles coa labor dos praceiros”, comentou a delegada territorial, quen apuntou que, “con propostas deste tipo, impúlsase unha venda moderna, con novos servizos, ao tempo que se mantén a súa esencia, baseada na calidade, a diversidade e a atención ao cliente”. “Todo isto non sería posible sen a estreita colaboración que concellos como o de Boiro veñen mantendo co Goberno galego”, incidiu.

    Neste sentido, a máxima representante do Goberno galego recordou que en poucas semanas se resolverá a nova orde de axudas destinada aos municipios galegos para impulsar as prazas de abastos, dotada con preto de 3 millóns de euros. Mediante esta convocatoria, os municipios de ata 70.000 habitantes poderán optar a axudas para a modernización dos mercados que chegan aos 150.000 euros.

    Apoiaranse tamén actuacións para atraer nova clientela e dinamizar as vendas nas prazas de abastos, así como proxectos de mellora nas rúas contiguas ás mesmas, con axudas de ata 80.000 euros. Os concellos de menos de 20.000 habitantes poden acceder ademais a apoios de ata 30.000 euros para realizar melloras nos espazos destinados aos mercados tradicionais de apertura periódica.

    Máis información
  • 23 Marzo, 2015
    A iniciativa da Xunta "Comercio con talento" impulsa a innovación e o emprendemento no sector implicando ao estudantado

    Santiago, 23 de marzo de 2015.- A directora xeral de Comercio, Sol Vázquez Abeal, e o director xeral de Educación, Formación Profesional e Innovación Educativa, Manuel Corredoira, presentaron esta tarde no compostelán IES de Pontepedriña a nova iniciativa da Xunta Comercio con talento, que ten por obxectivo impulsar a innovación e o emprendemento no sector comercial, ao tempo que se promove o coñecemento e o contacto do alumnado de formación profesional co sector e a súa realidade, complementando así a súa formación.

    Tal e como se salientou na presentación da iniciativa, que conta coa colaboración de Abanca, a campaña vai dirixida ao alumnado do ciclo formativo de grao medio de Comercio e ao de grado superior de Xestión comercial e marketing. Os estudantes dos centros participantes, que traballarán en grupos de catro persoas, deberán propoñer antes do 5 de xuño a candidatura do comercio que, ao seu xuízo, sexa o máis innovador da súa zona, seguindo determinados criterios.

    Un xurado especializado escollerá o negocio gañador en cada área, e os alumnos que propuxeran a súa candidatura recibirán premios para mercar no comercio local. Posteriormente, cada establecemento elixido recibirá un recoñecemento público e participará en diferentes iniciativas que se poñerán en marcha para difundir boas prácticas no sector comercial.

    A campaña Comercio con talento, na que está previsto que participen máis de 700 alumnos de 16 localidades diferentes, compleméntase cun concurso de fotografía que se vai desenvolver no portal do comerciante (portaldocomerciante.xunta.es) co que se convida á cidadanía a reflexionar sobre o talento nos establecementos, en eidos como o escaparatismo, a selección de produtos á venda ou o packaging. Os seis primeiros clasificados recibirán tamén premios en metálico para mercar no comercio local.

    O impulso ao sector comercial é un dos principais eixos da actuación da Consellería de Economía e Industria, que no que vai de ano leva activados xa programas de apoio por 7,6 millóns de euros centrados en eidos como a innovación e a modernización, o respaldo ao asociacionismo comercial ou a potenciación dos mercados e prazas de abastos.

    Máis información
  • 17 Marzo, 2015
    Conde subliña que a reforma do mercado de Pontedeume potenciará o atractivo turístico da vila e impulsará a economía

    Pontedeume (A Coruña), 17 de marzo de 2015.- O conselleiro de Economía e Industria, Francisco Conde, sinalou hoxe que a reforma do mercado de Pontedeume, na que Xunta, Concello e Deputación da Coruña investirán 1,6 millóns de euros, vai contribuír ao desenvolvemento económico da vila, beneficiando a todo o sector comercial e impulsando o papel da praza de abastos como parte do atractivo turístico da localidade.

    Neste sentido, Conde destacou que a cooperación institucional vai permitir a rehabilitación integral dun dos símbolos máis importantes de Pontedeume, e que a localidade conte cunha praza que sexa un referente. O mercado eumés é un exemplo de como os mercados de abastos e o comercio forman parte do patrimonio común, e vertebran a vida das vilas e cidades, e está chamado a ser un exemplo do camiño que a Consellería de Economía e Industria está a percorrer xunto cos concellos galegos para potenciar as prazas. O obxectivo deste trabalo é consolidalas como líderes na venda de produtos frescos e de calidade, dando resposta ás novas necesidades dos consumidores ao tempo que se mantén a súa esencia: a calidade, a diversidade e a atención ao cliente.

    Os mercados teñen un valor estratéxico para o comercio de proximidade, polo que a Xunta ten facilitado nos últimos anos actuacións en máis de 80 mercados, con apoios que superan os 17 millóns de euros. Ademais, a Consellería de Economía e Industria está a traballar na posta en marcha da Rede de Mercados Excelentes, á que podería unirse no futuro a praza eumesa.

    O apoio ás prazas de abastos é un dos eixos específicos da estratexia de apoio ao sector comercial da Consellería de Economía e Industria, que no que levamos de ano leva activados programas de apoio por 7,6 millóns de euros, centrados ademais de no impulso aos concellos na mellora dos mercados, no respaldo ao asociacionismo comercial, a innovación e a modernización.

    Máis información
  • 16 Marzo, 2015
    Estudantes de 16 colexios de Galicia aprenderán este trimestre a obter seda da man do proxecto Enredando, Artesanía na escola

    Oza dos Ríos (A Coruña), 16 de marzo de 2015.- Un total de 16 colexios de toda Galicia aprenderán durante este trimestre a obter seda grazas ao proxecto Enredando, Artesanía na escola, que pon en marcha a Consellería de Economía e Industria a través da Fundación Centro Galego da Artesanía e do Deseño, e que ten por obxectivo achegar aos máis novos os oficios artesanais, contribuíndo así á promoción e posta en valor do sector artesán galego, unha das liñas de acción do novo Plan de Artesanía de Galicia.

    O C.E.I.P. Oza dos Ríos foi hoxe o primeiro en acoller a segunda parte da unidade didáctica O Gremio da seda, na que o alumnado que xa participou anteriormente no proceso de coidado e a evolución dos vermes da seda, coñecerá da man de artesáns expertos a extracción desta para a confección do fío de seda.

    A actividade chegará nas próximas semanas a un total de 16 centros educativos de toda Galicia. Na provincia da Coruña celebrarase tamén no C.E.I.P. Francisco Vales Villamarín de Betanzos, no C.E.I.P. de Teixeiro en Curtis e no C.E.I.P. de Presaras de Vilasantar.

    Enredando, artesanía na escola conta tamén cunha unidade didáctica centrada na elaboración e encadernado de papel, Do papel ao libro, para alumnado de 3º ciclo de primaria e 1º ciclo de secundaria, cuxa posta en marcha tamén se retomará en próximas datas.

    Os principais obxectivos deste proxecto, que conta coa colaboración da Consellería de Cultura, Educación e Ordenación Universitaria, e no que participaron xa máis de 15.000 alumnos desde a súa posta en marcha hai catro anos, son concienciar a sociedade do valor do produto feito á man así como presentarlle aos rapaces e rapazas que a artesanía pode ser tamén unha boa alternativa para o seu futuro laboral. Tamén impulsar o relevo xeracional nos oficios máis tradicionais promovendo o desenvolvemento da artesanía galega a través da formación de futuros artesáns creadores; e amosar á sociedade o valor engadido da artesanía en canto á súa creatividade, patrimonio cultural e tradición.

    Contribúese así á posta en valor do sector artesán, unha das liñas de acción do novo Plan de Artesanía de Galicia, que ten por obxectivo conseguir un sector artesán sólido e sostible no tempo e que contribúa ao crecemento da economía galega, incidindo na competitividade empresarial e a potenciación do talento galego.

    Máis información
  • 14 Marzo, 2015
    O IGC conmemora o Día Mundial do Consumidor abrindo o laboratorio de consumo a escolares e consumidores

    Santiago, 14 de marzo de 2015.- O Instituto Galego de Consumo, dependente da Consellería de Economía e Industria, conmemora a celebración do Día Mundial dos Dereitos dos Consumidores abrindo o Laboratorio de Consumo de Galicia a escolares e consumidores. Así, o vindeiro martes 17 visitarán este centro situado na Coruña, cuxo traballo en coordinación coa Inspección de Consumo sitúa a Galicia á cabeza na vixilancia e seguridade dos produtos de consumo, alumnos de 4º da ESO do colexio Compañía de María da Coruña, mentres que o xoves 19 ás 11:30 horas poderán coñecer de preto o Laboratorio usuarios da Federación Galega de Asociacións de Amas de Casa, Consumidores e Usuarios – BRÉTEMA.

    Achégase así á sociedade o labor dun departamento que ten permitido que no 2014 o Instituto Galego de Consumo notificase un total de 71 produtos inseguros á Rede de alerta de produtos de consumo non alimenticios (SIRI), grazas a un traballo proactivo de vixilancia e control do mercado que sitúa ao IGC como a segunda autoridade autonómica de consumo que detectou máis produtos inseguros durante o ano pasado.

    Neste eido, o Instituto Galego de Consumo céntrase na prevención e na corrección do mercado, desenvolvendo estratexias para garantir que os produtos que chegan ao consumidor son totalmente seguros. Así, no Laboratorio de Consumo de Galicia realizáronse o ano pasado máis de 7.600 análises de produtos, o que supón case duplicar a cifra de 2008.

    No seu traballo a prol da defensa dos dereitos dos consumidores e usuarios, o Instituto Galego de Consumo tramitou o ano pasado máis de 21.200 reclamacións, das cales se resolveron xa un 45%. No tocante á arbitraxe, o ano pasado emitíronse preto de 3.600 laudos arbitrais, chegando nun 77% dos casos a acordos favorables para o consumidor. No ámbito da formación, a Escola Galega de Consumo organizou en 2014 un total de 186 actividades, ás que asistiron preto de 7.000 persoas.

    Día Mundial do Consumidor
    O 15 de marzo celébrase cada ano o Día Mundial dos Dereitos dos Consumidores, un acontecemento que foi instaurado en 1983 por Nacións Unidas para concienciar sobre os dereitos que asisten a todas as persoas como usuarios e consumidores.

    Coas actividades programadas no Laboratorio, o IGC súmase á iniciativa do Comité Europeo Económico e Social, que enfoca o European Consumer Day á análise sobre as tendencias actuais no consumo. Nas xornadas que se van celebrar a vindeira semana informarase sobre o papel do Laboratorio como vixiante do mercado, e poderanse coñecer os diferentes ensaios que se levan a cabo en produtos como xoguetes, artigos de puericultura, electrodomésticos, téxtiles ou equipamento técnico.

    Ademais destas actividades, con motivo da celebración do 15 de marzo o Instituto Galego de Consumo lembra a través da súa páxina web os dereitos das persoas consumidoras e usuarias, en eidos como a protección da saúde e seguridade; a protección dos intereses económicos e sociais; a educación e formación en materia de consumo; así como o dereito á representación, consulta e participación e o dereito a unha información veraz e axeitada.

    Máis información

  • Páxina 18 de 84

  • Mostrando do 341 ao 360 dun total de 1679 rexistros